#9 Rakista

Kumakanta habang may hawak na pick at gitara,
Tila personal na liham ang bawat awit na iyong ginagawa,
Patungo sa puso tagos bawat salita,
Bawat letra ay balot ng hiwaga.

#8 Tinta

Ang pangalan mo'y nais kong isulat,
Gamit ang itim na tinta dito sa aking balat,
Sapagka't alam kong huli na ang lahat,
Ang mahalin ka sa malayo ay tama na at sapat.

#7 Nebula

Sa may dakong doon,
Hiling ba'y matutugon,
Bawat bagsak ng bulalakaw,
Ngalan mo ang siyang sinisigaw.

Pipitasin isa-isa ang mga tala,
Hanggang mga bituin sa langit ay wala ng makita.
Iguguhit ang larawan mo sa bawat nebula,
Sa madilim na langit masulyapan ang iyong mukha.

#6 Ika-10 ng Umaga

Munting sandali,
Sa mesang kaharap ay kape,
Nanunumbalik ang mga dati,
Mga pangarap na hindi na nai-uwi.

#5 Kahon at Tala

Sa ilalim ng mga tala,
Naka dungaw sa bintana,
Hawak ang mainit na kape,
Habang pikit ang iyong mga mata sa aking tabi.

#4 Realidad

Sapagka't ito ang realidad,
Hindi lahat ng pangarap ay natutupad,
Kaligayahan ko'y hahayaang lumipad,
Pagka't mas mahalaga ang iyong seguridad.

#3 Himig sa Dilim

Saan ka nga ba tutungo?
Hiwaga ng agos mo,
Bawat hirap, bawat sakripisyo,
Mas mahalaga ka kaysa pangarap ko.

#2 Munting Perpekto

Sa mundo mong magulo at masikip,
Munting panahon nakadungaw sa bintana at nag-iisip,
Habang kumakain ng tsokolate at nagmamasid,
Tulog ang mga tao at mga tala'y nakasilip.

.

#1 Sa Dulo ng mga Daliri

Kaibigan kong gitara, papel, lapis, at bintana,
Matang nakatanaw sa himig na pilit ginagawa,
Kelan nga ba dapat ihinto ang pangarap na tila walang pupuntahan,
Ngunit musika ang siyang tanging laman ng puso at isipan.

Ikaw, ikaw na sumasalamin sa bawat awit na nililikha,
Ikaw ang siyang pangalan sa bawat karakter na ginagawa,
Ang siyang tema sa likod ng bawat tula,
Ang tunog sa dulo ng mga daliri tuwing nag gigitara.

Sa bawat kape, alak, at usok ng sigarilyo,
Sa bawat hiwaga ng gabi at pag-asa na dulot ng umaga,
Alab ng pusong di paaawat at di sumusuko,
Masilayan muli ganda ng mukha mo.